ដោយ៖ ខ្មែរស្ថាបនា ថ្ងៃពុធ ទី26 ខែតុលា ឆ្នាំ2011 ម៉ោង 12:00
នៅឆ្នាំ១៩៩១ ប្តីប្រពន្ធសញ្ជាតិអាល្លឺម៉ង់ ២នាក់ ឈ្មោះ Helmut និង Erika Simon បានរកឃើញនៅជើងភ្នំ Alps (ជិតព្រំដែនរវាងអូទ្រីស្ត និងអ៊ីតាលី) សាកសពមួយដែលត្រូវបានរក្សាភាពដើមដ៏ល្អ ដោយសារព្រិលទឹកក។ គេបានដាក់ឈ្មោះឲ្យវាថា “មនុស្សទឹកកក Otzi” ដែលយកលំនាំនៃឈ្មោះជ្រលងភ្នំ កន្លែងដែលរកឃើញ។
សាកសពអាយុកាល ៥០០ឆ្នាំ មានឈ្មោះថា មនុស្សទឹកកក Otzi
តាមរយៈការត្រួតពិនិត្យវាយតម្លៃ ពួកអ្នកស្រាវជ្រាវ បានឲ្យដឹងថា នេះជាសាកសពត្រូវបានធម្មជាតិរក្សាទុកល្អបំផុត (ជាង ៥៣០០ឆ្នាំ) និងមានអាយុកាលច្រើនជាងគេនៅទ្វីបអឺរ៉ុប។ ពួកអ្នកវិទ្យាសាស្រ្តបានទាញយកទល្ហីករណ៍ដ៏ច្រើននាំមកការស្លាប់របស់ មនុស្សទឹកកក Otzi គឺគេនៅតែពុំរកឃើញដាន ឬ ភ័ស្តុតាងគូសបញ្ជាក់ពីប្រវត្តិជីវិតរបស់មនុស្សទឹកកកនេះឡើយ។
ត្រូវបានពង្រាងជារូបភាពពេញលេញឆ្លងតាមរយៈគំរោងឆ្អឹងរបស់មនុស្ស Otzi
ក្នុងពេលទន្ទឹមគ្នានោះ ការស្លាប់ជាបន្តបន្ទាប់ និងអាថ៌កំបាំងរបស់អ្នកដែលពាក់ព័ន្ធនឹងសាកសពពនេះ បានកើតឡើងយ៉ាងពិតប្រាកដ។ ជនរងគ្រោះដំបូង គឺជាសមាជិកក្រុមអប់សាកសព បណ្ឌិត Rainer Henn ។ លោកបានរងគ្រោះថ្នាក់ស្លាប់តាមផ្លូវធ្វើដំណើរទៅចូលរួមសិក្ខាសាលាមួយ ពីមនុស្សទឹកកក Otzi នាឆ្នាំ១៩៩២ ។ បន្ទាប់មកអ្នកឡើងភ្នំ Kurt Fritz គឺជាងអ្នកដែលនាំបណ្ឌិត Henn ទៅទស្សនាកន្លែងរកឃើញសាកសពនោះ បានស្លាប់ដោយសារព្យុះព្រិល។
ដំណើរការត្រួតពិនិត្យសាកសពអាយុកាលជាង ៥៣០០ឆ្នាំ ជនរងគ្រោះទី៣ គឺជាអ្នកផ្សព្វផ្សាយព័ត៌មាន ពីមនុស្សទឹកកក Otzi ទៅកាន់ពិភពលោកទាំងមូល ដែលជាអ្នកសារព័ត៌មាន Rainer Heoll ។ លោកបានរងនូវជម្ងឺដ៏ចម្លែក ក្រោយពីខ្សែភាពយន្តស្តីពីមនុស្សទឹកក Otzi ត្រូវបានដាក់បញ្ចាំង។
បន្ទាប់មកទៀតដល់វេន អ្នករកឃើញសាកសពនេះ គឺលោក Helmat Simon ក៏ត្រូវបានស្លាប់ដោយសារព្យុះព្រិលកើតឡើងយ៉ាងប្រថុថញុច បន្ទាប់ពីទើបតែបានទទួលលុយ ៥០.០០០ផោន ដែលជារង្វាន់សំរាប់ “ការរកឃើញវត្ថុមានតម្លៃ” ។ នៅមិនទាន់ចប់ទេ! គេបានរកឃើញអ្នកបញ្ចុះសពលោក Helmut Simon ត្រូវស្លាប់ តែក្រោយ ពិធីបុណ្យ។
វត្ថុដែលរកឃើញនៅក្បែរមនុស្សទឹកកក Otzi ជនរងគ្រោះទី៦ គឺជាអ្នកឯកទេសស្រាវជ្រាវអំពីមនុស្សទឹកកក លោក Konrad Spindler ដែលត្រូវស្លាប់ដោយពុំដឹងមូលហេតុនៅឆ្នាំ ២០០៥។ ចុងក្រោយ គឺអ្នកដែលបានវិភាគគំរូឈាមលើសម្លៀកបំពាក់ និងអាវុធដែលនៅក្បែរសាកសព Otzi គឺបណ្ឌិត Tomloy គាត់បានស្លាប់ គ្រាដែលសៀវភៅស្តីពីមនុស្សទឹកកកនេះ សរសេរពុំទាន់រួចរាល់ផង។
មរណៈភាពជាបន្តបន្ទាប់ ដោយប្រថុចញ៉ុច និងមិនមានមូលហេតុច្បាស់លាស់របស់ពួកអ្នកបូរាណវិទ្យា អ្នកឯកទេសជាន់ខ្ពស់ និងអ្នកទាំងឡាយដែលមុនស្លាប់ សុទ្ធសឹងពាក់ព័ន្ធជាមួយមនុស្សទឹកកក Otzi បណ្តាលឲ្យគេជៀសមិនរួចពីការងឿងឆ្ងល់ និងព្រួយបារម្ភ។ ប៉ុន្តែរហូតទល់ពេលនេះ វិទ្យាសាស្រ្តនៅតែពុំទាន់បកស្រាយបាននូវអាថ៌កំបាំងជុំវិញ “ពាក្យបណ្តាស់សារ” ដែលនាំមកនូវការស្លាប់ទាំងឡាយខាងលើនៅឡើយទេ។
អ្នកបូរាណវិទ្យា និងវិទ្យាសាស្រ្ត កំពុងប្រឹងប្រែងស្រាវជ្រាវ ដើម្បីឆ្លើយតបជាមួយសំនួរៈ ដើមកំណើតមូលហេតុដែលនាំមកការស្លាប់របស់មនុស្សទឹកកក Otzi ៕
